الاثنين، 1 ديسمبر 2008

المتحرحش الصغير

المتحرحش الصغير
والله ممكن محدش يصدقنى
انى اقول فى متحرحشين صغيرين انتشروا فى البلد زى الوباء
يعنى مثلا وانتى ماشيه فى الشارع يا اختى تلاقى متحرحش صغير مش باين من الارض
بيخبطك فى حته مش تمام يمسكك من مناطق مش هى
انتى تبصى وراكى مفيش حاجه غير خيال صغير فى اخر الشارع بيجرى
لتمسكيه
مره تانيه تكونى ماشيه كده لا بيكى ولا عليكى
تلاقى كبش فيكى عيل صغير مكلملش السبع سنين ويقولك الفاظ وحشه
الاول كانت ظاهره غريبه ولو حكيت لحد مكنش يصدق
بس دلوقت لو حكيت لبنت مثلا هتصوووت فى وشى وتقول يييييه
ببقى نفسى ادبحوا وادفنه مكانه بس لما يسألونى عمل ايه ابقى اقولهم ايه
ونبى هتكسف اقول .................
الغريب فى الحكايه دى ايه الى وصل العيال للكلام ده
الاطفال دول اكيد ليهم قدوة
او شافوا حد بيعمل كده .. اصل مثلا لو بيسرق هقول هيستفيد
لكن ايه الى هيستفاده عيل مكملش العشر سنين من انه يمسك بنت من منطقه مش هى
ولا يعمل معاها حركه مش كويسه ويجرى
امبارح الصبح بدرى ماشيه فى الشارع ومفيش فى الشارع غير عيلين صغيرين
المهم انا رايحه الكليه سمعت الولا بيقول لصاحبه ها انت هتعمل ايه
وبيبصلى جامد بصوت واطى انا سمعت
وقفت كده
قلتله ومصحف ربنا مهعلقك غير عالعمود ده
انت ابن مين يلا انت وهو
رد الاصغر فيهم قال انا مش ليا دعوه هو الى قاللى هنعمل كذا
انت فى المدرسه دى يلا
قاللى آه
تعالى انا هوديك للمدير بتاعك يتصرف معاك
انا بصراحه اتكسفت
بنت طيب ولو رحت اشتكيت هقول ايه
اكيد هتكسف
روح المردى ولو شفتك فى الشارع تانى هتعمل الحركه دى مع اى واحده هعرف اجيبك والله
ساعتها ما حد هيرحمك منى
روح كتك مصيبه تلمك
انا لو كان عمل حاجه كنت دفنته مكانه
انا عايزة افهم ايه الموضوع ده وازاى بقا منشور كده فى مجتمعنا
حتى العيال الصغيرين
نفسى افهم من ايه ده
طب العيل الصغير الى بيعمل كده من دلوقت لما يكبر شويه هيعمل ايه ؟؟؟؟

هناك 4 تعليقات:

حرية يقول...

على فكرة موضوع جيد جدا جدا يا بنت

الشمس, فكرة حلوة انك تتكلمي

وتبادري بيها

انا اعرف المشكلة لكن بجد اول مرة اشوف حد كتب عنهاولا حت الصحفيين ;)

شكرا للسبق وتحياتي لكي يا افندم

:)

غير معرف يقول...

"لكن ايه الى هيستفاده عيل مكملش العشر سنين من انه يمسك بنت من منطقه مش هى
ولا يعمل معاها حركه مش كويسه ويجرى"

و أنت فاكرة أن المتحرش الكبير لما يقفش في واحدة ماشية بيستفيد حاجة؟

الموضوع ما لهش دعوة بالمتعة الجنسية خالص. دا مجرد فرض إرادة و تسلط، لأنه عارف أن الضحية هتخاف و تنكسف و مش هتقدر تقول لحد، و بيبقى هو فاز عليها نفسيا.

Unknown يقول...

حرية منور مدونتى
وميرسى على كلامك
والله الموضوع اثارنى وانتشاره بطريقه غير عاديه فى الشارع المصرى
واطفال مدارس ابتدائى
والبنت بتبقى مكسوفه تعمل ايه
ده موضوع مش لازم السكوت عنه
اذا كان التحرش من الكبار جريمة
فأكبر جريمه عملها المجتمع انه يطلع اطفال فيهم الاخلاق والسلوكيات دى


وانا مع ال غير معرف
فعلا هو انتصار نفسى مش متعه
بس اصلا ليه يبقى فى كده فى مجتمع مسلم
ولا احنا بنقلد الغرب حتى فى كونهم زباله
انا نفسى فعلا يبقى فى تقويم من المدرسين والمدارس والبيت والمسجد
توعيه للأهل
كل حاجه حمايه وترشيد

وشكرا على وجودكم

hossam_ thabet يقول...

جميل كلامك وطرحك للموضوع
بس دا نابع فعلا من عدم توجيه الاهل وبعدهم عن تعاليم الدين وان الاهل دايما فاكرين ان الولد مابيغلطش وان هو الملاك البرئ
بجد انا نفسي الاباء يشوفوا ابناءهم علي حقيقتهم اللي بيكونوا عليها في الشارع علشان لو عندهم النيه انهم يربوا العيال دول يبقوا يقدروا صح