الاثنين، 15 يونيو 2009

التعليم ..... بدون عنوان

السلام عليكم وحمة الله وبركاته
وحشتونى جدا ووحشتنى تعليقاتكم وتريقاتكم وفرحتكم فيا حتى فى البوست اللى فات
بس انا جايه النهارده اطلعلكم هلاويسى وافكارى اللى حابساها ومفقوعه منها وجاية اناقشكم فى مشكله بجد بتمس
مجتمعنا المصرى وقلة وعيه وانقياده وراء الهوى بلا تفكير
والمعتقدات الخاطئة والمظاهر الكاذبه
المشكله دى هى
قلة الوعى التعليمى عند المصريين
اكيد طبعا فى منكم اللى فاهمنى وفى منكم اللى هيقولى يعنى ايه
محنا بنذاكر ونحفظ الكتب ونصم ونحط فى الورقه وبننجح وبقينا اهو كل واحد فى شغله منصب قد الدنيا
وانا حد قدى
قعدت عشر دقايق قبل امتحان اللغه العربيه لأمل اختى معاها هى وواحده صحبتها مع العلم انها فى الصف الثالث الاعدادى
وبالطبع كسياسة تعليم فى مصر
لو جبت مجموع دخلت ثانوى عام
مجبتش مجموع ( دخلت النار ) اقصد ثانوى تجارى او صناعى
وبالتالى محدش له نفس ن العيال يدخل صنايع او تجاره
حلووووو
بسأل البنوته صحبة اختى
نفسك تدخلى ايه يا امورة بعد الاعداديه
قالتلى ثانوى طبعا دنا لو دخلت صنايع امى تدبحنى
اومال بحفظ ومش لاحقه افهم ليه عشان اجيب مجموع
فكرت فى نفسى ولقيت ان القضيه دى مش قضيه اختى واصحابها دى قضيه المجتمع المصرى بحاله
ونظرته للمظاهر الكاذبه والفشل فى الحياة الدراسيه فى الثانوى والجامعه مبنيه على قلة الوعى التعليمى
لأن البنى ادم المصرى يتمنى ابنه دكتور ومهندس
وانه هيبقى نظرة المجتمع ليه مش كويسه لو طلع سباك او نجار مع انهم بالطبع متساويين فى احتياج المجتمع ليهم
مهو السباك دكتور فى مهنته والنجار دكتور فى مهنته
وقد يكون السباك والنجار على قدر من الثقافه الملم بيها الدكتور وزياده
ليه دايما اللى يدخل مدرسه صناعى يبقى اقل من مستوى الجامعيين
مع انه لو فى وعى نحية الطلبه اللى بيدرسوا فى المدارس دى وان اساتذهم يفهموهم ان وجودهم فى المدرسه اصه بناء
مجتمع وبناء حضارة لأن بدونهم بجد المجتمع مراكبه متسيرش
لأن علم المعلم نظرى لكن علم طلبة المدارس دى علم وعمل
لو فى وعى انهم يجتهدوا ويخرجوا للمجتمع كبناة حضارة بدفعه
وفهم مش خريجى اعدادى مش بيعرفوا يقروا عشان يترموا فى المدارس دى ويعدوهم كده
اكيد فاهميننى ربما لم يحالفنى الحظ انى اكمل الموضوع ده دلوقت لأنى فى الغربه بس ليه بقيه
انا عايزه المدارس الصناعيه والتجاريه تشتغل احسن من مدارس الثانوى الشغاله اونطه بالصم بدون فهم ولا عمل
ويطلع شباب الجامعات معظمهم شباب تافه ينزل فى مواد وممكن يعمر فى الجامعه ويبقى خبره سنين الا من رحم ربى
اما بالغش .... ولا يخفى علينا
او يعدى بماده ومادتين ومعندوش ماده علميه يخرج بيها يبنى امه بعلمه
او معندوش فهم وميكملش اصلا
الشعب المصرى انا عايز ابنى يطلع دكتور ومش مهم ازاى المهم انه يطلع دكتور
طب ايه رايكم لو كل الناس دكاتره هنبنى بيوت ازاى
وهنجيب ابواب وشبابيك منين
وهنصنع ايه اكيد كله استيراد وتصدير وعيالنا يقعدوا يشوفو العيانين ويعالجوهم بس ويا ريت هيعالجوهم دول هيستوردوا الدوا من بره عشان يعالجوهم
انا نفسى حد يقدر كلامى ويفهموا انا طولت معاكم بس دى مشكله الشعب المصرى
قلة الوعى فى كل حاجه
اتمنى تعليقاتكم ووجودكم معايا بمساهمه فى وضع حلول انا عايزه جهات تساعد فى نشر الوعى التعليمى الاول
على المعلمين اللى بيربوا الاجيال ويفهموهم معنى العلم والعمل وازاى اوروبا وغيرها تقدموا وبنوا حضارة
وبعدين على الطلبه واولياء الامور وخاصة الاعلام لازم يوجه انظاره لكده