مش عارفه ليه فى الوقت ده بالذات قررت اكتب كل اللى عايزه أقوله
ومش عارفه رد الفعل اللى ممكن يحصل من اللى هيقرأ البوست ده
وبرضه مش عارفه أبدأ ازاى ، بس بما انى قررت اتكلم يبقى هقول كل اللى بيدور فى عقلى وتفكيرى
فارس أحلامى :
كلمه بنقولها بتعبر عن الشاب الوسيم أبو حصان أبيض اللى بييجى فى الأفلام فى الحلم بتاع البطله
يخطفها على حصانه ويجرى بيها بعيد عن كل مخاوفها وهمومها وأحزانها
وغالباً ما بيكون الامل اللى عايشه عليه البنوته اللى لسه ملقتش فارس احلامها
ان فى فارس أحلام هييجى يخطفها ،
ومواصفات الفارس ده بتختلف من بطله لبطله قصدى من - بنت لبنت -
يعنى عند بنت تلاقيها ممكن متكونش عايزاه بحصان ابيض وتكون عايزاه بعربية جيب حمرا موديل 2011
وبنت تانية تكون عايزاه بعيون خضر وشعر اصفر والحاجات دى انتوا عارفين البنات بقى - مش محتاجين انى لسه احكيلكوا -
نيجى للمهم :
فارس أحلامى انا ممكن يكون مواصفاته مختلفة شويه - ممكن تكون مألوفه لبعض الناس - وممكن تكون غريبه
خاصة لما يعرفوا وجهة نظرى فى الجواز أصلاً
يعنى أنا مثلاً شايفه ان لو المجتمع ميبقاش نظرته قاسية للبنت اللى ممكن تقعد من غير جواز ويجرحوها بنظراتهم وألسنتهم وتصرفاتهم ويطلق عليها لفظ (عانس) كنت هقول انا مش عايزه اتجوز ومش مهم عندى وده طبعاً لأسباب
ان مواصفات فارس أحلامى بالنسبالى مش لقيتها وحاسه انى مش هلاقيها يبقى هتجوز كده وخلاص (~_~) بذمتكوا مش يبقى افترى
اه انا هبقى جريئة واقول ان الجيل الموجود دلوقت من الشباب معظمه غير قادر على تحمل مسئولية بيت وأسرة
وعلى تفهم متطلبات الحياة .. وعلى احتواء زوجته واهل بيته - عشان كده حالات الطلاق زيادة اليومين دول -
والآخر يقولوا الستات زادوا فى- كفران العشير -
مهو مش كل رفض لحاجه بالنسبة للست تبقى كفران عشير ونكران مش عارف ايه
مهو انا بقى عندى مخاوف اعيش حياة الستات المقهورات فى الأرض :D ( حلو تعبير مقهورات ده )
عايزه زوج ناضج عقلياً : ( مش معنى كده لا سمح الله ان الرجاله مش ناضجين عقليا ً يعنى ) بس عالأقل يبقى اكبر منى ب 7 سنين
- وده هتجيبيه منين بقا ان شاء الله - مش عارفه اكيد هجيبه منين ..
بس انا متخيله ان الشخص الى فى نفس سنى او اكبر منى بسنه اواتنين او تلاته هيعيش مستوى سنى ومستوى تفكيرى وانا مش عايزه واحد يقفلى عالواحده ونلعب مع بعض قط وفار وله صحبات مش عارف ايه وعايش معايا ند بند
انا محتاجه زوجى يكون أب ليا قبل ما يكون زوج .. يحتوينى يفهمنى .. لو عندى نقص فى شئ ما يجبره
لو فى حاجه مش عارفاها يعرفهالى يعلمنى .. لو غلطت يكون رحيم بيا ويعرفنى الصح والغلط
عايزه زوج يحبنى : ( الموضوع ده مش مشكله .. فعلاً الحب بييجى بعد الجواز .. واكيد يعنى مش هيتجوزنى عياقه اكيد هيكون بيحبنى وعندنا قبول لبعض )
عايزاه زوج متدين ( متفتح ) : محدش يقولى ايه ( متدين متفتح دى )
انا فى مره احد الصديقات سألتنى عن مواصفات فارس احلامى اختصرتلها كل اللى بقوله فى كلمتين
عايزه اتجوز اخوانجى متحرر وكذا حد سألنى وكانت نفس الاجابة هى ردى
مع انى مش اخوانجية - بس انا مقصدتش اللفظ حقيقة - انا قصدت ما يحويه من صفات
يعنى زوج تقى ، متربى تربية فاضله ، من بيت طيب متدين .. متربى عالصلاة والصيام والقيام والجهاد فى سبيل الله
ورعاية الأسرة وقدسية الحياة الزوجية ، عنده كل ما فى الاخوان ( من تربية وخلق ودين )
اما عن كلمة - متحرر - فأقصد فى الفكر السياسى : متقبل للرأى الاخر ، معاملته لينه ، سهل وبسيط مش متزمت زى بعض الاخوان
ومش معنى كده ان الاخوان بس اللى فيهم الصفات دى .. بس ده من باب شهرتهم الواسعه بهذه الصفات الطيبة .
وده كمان لأنى ( مش اخوانجية ) فصعب اتجوز اخوانجى بما انهم مبياخدوش الا اخوات على رأى ( صبحى صالح )
والمشكله ان بعض الناس اللى ممكن يطلبوا االزواج منى يفتقدوا بعض الصفات اللى انا محتاجاها فى زوج المستقبل
اما السن مقارب او فى نفس السن وبالتالى فى أول دعديره بيقعوا
أو - طفوليون - زياده عن اللزوم ، وانا مش فيا دماغ أدادى
وعلى رأى الأستاذ ( كاظم الساهر ) ان الرجال جميعهم أطفال فده مش معناه ان الأكبر منى ب7 سنين مش هيبقى طفل أكيد هتعامل معاه بما يرضى الله وهكون برضه حنينة عليه وكويسه معاه .. لأن بمعنى أصح المعاملة من ناحية ( المرأة ) مع زوجها أياً كان مواصفاته -ثابته- لأن من اهم صفات المرأة حنانها .
او مش متدين - من وجهة نظرى - مهو التدين مش صوم وصلاة وزكاة وبس
لا التدين حاجات تانية كتير اوسع فى مفهومى عن التدين من حصرها فى الفروض والعبادات البدنيه
انما التدين عندى بجانب العبادات البدنية لازم يكون تدين فى -الفكر المجتمعى-
والفكر السياسى وخاصة الفكر السياسى ده
آه مهو ممكن يكون واحد بيصلى ويصوم ويزكى وييجى يقولك انا فكرى السياسى ليبرالى .. ده ممكن اخبطه فى دماغه بأى حاجه تيجى فى ايدى .. سامحونى بقا أصل الحوار ده بيعصبنى .
ممكن أقول يكون ( أزهرى ) تصدقوا والله ممكن ،حتى هيوافقنى فى كل افكارى ومعتقداتى ونظرياتى دارس نفس دراستى وفاهم الدين كويس .. وفكره السياسى هيكون اسلامى معتدل ، مهو مش معقول اللى ههرب منه هلاقيه فى وشى - مش معقول فى أزهرى ليبرالى او علمانى او مش عارف ايه - وإلا لو فى يعنى يبقى مش دارس فى الأزهر ده يبقى دارس تحت بير السلم .
انا مش خايفه لحد دلوقت عالأقل ( لأنى لما برفض حد ) او ميكونش فى نصيب بينى وبين حد - ببرر لنفسى بإنى لسه صغيره -
ومواصفات فارس احلامى مش كبيره للدرجه انى ملاقيهاش فى بشر يعنى .
لأنى اللى شجعنى انى أفصح عن المواصفات دى انى فعلاً لاقيتها فى ناس - يعنى موجوده - مش مستحيله بس الناس دول معظمهم عشان كبار بيبقوا متزوجين وعندهم عيال كمان .
والله انا لو لاقيت المواصفات اللى انا قلت عليها فى رجل متزوج وعنده استعداد يتجوز مره تانيه ( صدقاً مش هرفض ) بشرط يكون مقبول شكلاً وموضوعاً .
وبشرط ان ملاقيش المواصفات دى فى حد لسه متجوزش .
ناس كتير هتقول الكلام ده ينزل فى اعلان طلب للزواج فى جرنال او مجله - بس أنا قصدى تانى خالص من البوست ده -
قصدت أقول للشباب اللى مقبلين على الزواج ان فى بنات كتير زيى .. مش كل أملهم فى العربيه اللى انت راكبها ولا لون عينيك
أهم حاجه نضجك العقلى وثقافتك وتدينك ..
مش منظر لبسك اللى هيفرق معاهم مش مهم بدلتك سعرها كام ، او موبايلك نوعه ايه .
ان فى بنات بتحط مقياس حفاظك عليها بمقياس حبك لدينك .
ان فى بنات مش محتاجه من أكتر من ان انت تكون لها أب حنون وزوج محب ، وأخ شجاع ، وصديق وفى . ومعلم أمين ورب أسرة ناجح .
ممكن واحد بعد ما يقرأ يقول هما البنات هيتشرطوا ويقولوا عايزين مش عارف ايه وعايزين ايه اومال هما هيعملوا ايه .
مش هقول أكتر من ان البنت اللى هتطلب يكون رفيق حياتها زوج تقى انها هتنفذ الوصايا العشره اللى وصت بهم الاعرابية بنتها .
اللهم اجعلنا مؤمنين حق الايمان .. وزد ايماننا .. واجعلنا للمتقين امام
اللهم ارزقنا طهر مريم .. وتقى يوسف .. ورقة قلب محمد عليه أفضل الصلاة والسلام .
