بشوف فى الحلم .. حب العمر بيتجسد لحظات الحزن عشان يواسينى ويمسح دمعى
ويفرحنى .. وبايده يخلصنى من كل همومى واحزانى .. ولما بيبعد عنى بضيع
واتمناه يرجع تانى .. جه فى مره وقالى بحبك اكتر منى .. قلت اسمعنى
ليه انت بس مجرد حلم .. امتى هشوفك ؟
امتى هكونلك وانت تكونلى ؟
كان بالنسبالى الاب فى الحنيه .. واخويا وطبعه الهادى عليا
وامى الغاليه وكل ما ليا .. كان بالنسبالى كل الحب
كنت فى مره ( ده جوه الحلم ) بقوله واحشنى
ليه بتجيلى ساعات وساعات
خليك معايا كل الاوقات
دنا على صدرك بنسى همومى واجى احكيلك عاللى حصلى
واجى اشكيلك من الى جرالى
فاكر انت الفستان الاسود الى قصير حد الركبه
والصندل الكعب العالى ..
وشعرى الاسود .. لما عجبتك ..
كنت انا مكسوفه انى اقولك يومها..... بحبك
كنت كل يوم بستنى النوم يجينى عشان اشوفك
وبحبك ليا تحيينى
عندى انت كل حياتى
يا ريتنى اشوفك كده لو مره بره الحلم
ولا ده بقا مش حظى يكونلى الفرح
ولا انا مكتوب عليا الجرح فى دنيا الغابه الى انا عايشاها
ليه كل الحلو بيفضل حلم
ليه كل الطيب .. مش موجود
يمكن ده خيال .. او امنيات
بس انا هحكيلك
رسمتك .. على لوحه كبيره
وفى وسط اوراقى خبيتك
لأنى عمرى ما حبيت غيرك
اصل انا حبى مجرد حلم
وبيت كبير جواه حب بيحوينا
وكلمة رقيقه تطلع منا بتدفينا
فى عز البرد
انا لو هحكيلك كل مشاعرى
هقصر برضه
انا هوصف فيك للدنيا بحالها
اوصف فى عينيك
لا انا اخاف يحسدونى عليك
وكمان لا انا غيرتى عليك
اكبر من اى كلام
ليه بتجيلى فى الاحلام
فاكر يوم ما كنت مذاكرة وخايفه
اروح الامتحان
جيت على خدى تمسح دمعى وتطمنى
وتقولى معاكى بقلبى وروحى
كنت انا قبل ما اعمل حاجه اجى اقولك
وساعات بتحايل
وترسم بسمه كبيره
وممكن تقلب بضحكه تطير قلبى وعقلى
واجى فى حضنك
ومن كتر الفرح بقربك
ابكى
ولما بتجيى ساعات وتغيب
ازعل منك
ايوه بخاصمك وابعد عنك
مش بتقدر ضعفى وحزنى
لما انت بتبعد عنى
انت امان الدنيا فى عمرى
انا من كل الدنيا بخاف
بهرب من دنيا الاوجاع علشان الاقيك
واتوه فى عينيك
واقول ارحمنى بحبك ليا تعالى احضنى
وخلصنى
من خيانه كل اصحابى
وكذب الناس
بحبك انت
وامتى هشوفك كده لو مره بره الحلم ؟
