السبت، 16 مارس 2019

قلب أحب ٢

كانت تراجع نفسها كل يوم بل كل ساعة وكل لحظة
تقف عاجزة أمام الوداع القاتل الذي قرره وحده
كان يودعها بطريقته وكلما تمر ببالها هذه الفكرة تثور جنوناً ، كيف فعلها ، ولماذا لم يخبرها أنه الوداع
كان دوماً يؤكد أنه موجود ، لن يرحل أبدا وان بعدت المسافات
كيف يغدقها حباً ، يهديها فرحاً ، يهبها بحبه وعشقه حياة ثم تستيقظ في اليوم التالي تجده قد سلب منها كل شيئ ، ولم يبقِ لها شيئ .
كيف أتته القسوة على قلبها العاشق وعقلها المستسلم حباً وعشقاً وايماناً
كيف يحرق قلباً اطمئن به ومعه وسكن تماماً بحضرته وبداخل قلبه
قلب اكتفى به ، كيف يرحل عنها وهي التي أخبرته مراراً انها تشتاق اليه وهو معها ، فكيف لو رحل ؟
يعجز عقلها عن استيعاب قوته في البعد عنها
بعد ان انعجن قلبيهما بالحب ، وذابا في تفاصيل التفاصيل .
كيف يرحل وهو الذي فك عقدة لسانها وانطقها ما لم تنطقه لبشر سواه ، وافرغت أمام عيناه وبين يديه صندوق اسرارها الذي تكنه نفسها ، ولا يعلمه بشر

يتبع

الجمعة، 15 مارس 2019

قلب أحب

ستة أشهر واحد عشر يوماً
مروا كأنهم دهور 
أحبته كما لم تعرف البشرية حباً من قبل 
هي تدرك أن لا أحد قد يصله ما تشعر به هي 
حتى هو ،، ربما يدرك أنها تحبه بدرجة كبيرة 
لكن لا يعرف إلى أي درجة وصلت 
هي تكتب وتكتب وتكتب وتمزق اوراقها وتمحي 
مذكرات هاتفها ، فلا شيئ فيما تكتبه يعبر حقاً عما بداخلها ، ولا يصف أي شيئ 
عاشت في عجز تام مدة خمس شهور منذ أن فارقها 
أن تصف براكين غيرتها النشطة ، وثورات قلبها المتقدة ، ورفضها وغضبها حد تمنيها ان تراه فتخرج كامل غضبها في وجهه ثم تسقط بين يديه كطفلته 
تتلمس بكفيها ملامحه ، وتضع رأسها على صدره
متمنية ان يعانقها إلى ان  تفيض روحها 
اكتفاءاً .
عاشت بين نارين ، تعبير غير موفق
ليس بينهما بل بداخلهما 
تحترق فقط 
مكبلة عاجزة تمكن منها الخوف مكسورة العينين 
فقدت تماماً الثقة في نفسها ، صار لسان حالها 
من أنا حتى استحق حب أحدهم أو بقاءه ، وهل استحق أن يدخل أحدهم حرباً لأجلي 
حيث لاجمال ولا مكانه 
تملك الشك منها هل كان مايقال لها مجرد مجاملات وشفقه ، أم كان حقيقة؟! ؟
بفقده فقدت كل شيئ 
حتى اوشكت على الايمان بأن العيب لم يكن يوما سوى فيها .
تمر الليالي بظلمتها تختبئ في بعض ذكرياتها معه خوفاً ، تحتفظ بكل شيئ 
لا تنام قبل ان تسمع صوته يقول لها ( تصبحي على خير بس دي اخر مرة ) 
هي لن تكون ابداً المرة الاخيره 


يتبع 





الاثنين، 25 فبراير 2019

المستخدم غير موجود

المستخدم غير موجود

اعمل سيرش بالاسم 
بالعيلة 
بالتاريخ 
بالهوايات 
فتش في الفريند ليست 
عن اصحاب مقربين 

المستخدم غير موجود 

 الكل أجمعوا أنهم ميعرفوش شيئ عنه
نتايج بحثك مبتوصلكش لحاجه 

ييجي عليك وقت 
تشك في نفسك 

هو كان موجود فعلاً ؟
ولا شخصية في خيالك انت بس ؟

 شك حقيقي 

هو انا ممكن أكون كل ده كان بيتهيألي ؟!؟

الصوت لسه بيرن في ودنك
معقول مش حقيقي 
الكلام ، الطبطبه ، التهوين 
المشاركه ، الضحك 
الحزن !! 
كل ده مجرد وهم صنعه عقلك وصدقه
وفقت في يوم فعلاً لقيتك كنت 

بتهلوس 

والمستخدم غير موجود



السبت، 22 ديسمبر 2018

كده مرتاحة ؟

٢٢ ديسمبر ٢٠١٦
كده مرتاحة ؟
خدتي في حضنك كل سعادة الكون ومشيتي  
خايفه تفوقي تلاقي في حضنك محض سراب  

لما رجعلك وجه يراضيكي
 مكانش ده حب 
كان احساس جواه بالذنب 
انك راضيه بكل ظروفه 
وانك شايله طفل باسمه 
ولما تنامي تحلمي بيه 
ولما بتصحي تبوسي كفوفه
هو بيحلم بواحده سواكي
ايوه بيكدب 
مهما حلف انه بيهواكي 
وان بنات الكون ده بحاله 
ماتوا في عينه يوم ما لقاكي 
نفسي تفوقي وتصحي لنفسك

بتحبيه !! 
عايزاه يحبك !! 

لازم يخرج من جواكي 

نهاية حكايتنا



لو كانت
 نهاية حكايتنا 
تشبه كل النهايات 
كنت رضيت وقلت دي سنة 
ولازمة لكل الحكايات 

لكن اصعب شيئ جنني 
ان مفيش اسباب تبعدنا 
طب ليه بعدنا !! 

قلبك كان بيدق باسمي 
وعاشق وصفي 
ودايب فيا بكل جنان

وانا بتنفس حب في قربك 
وحضنك ليا بر امان 

فجأة لقيتنا مجرد ذكري 
ولا طايلين حتي النسيان
ولا لاقيين اسباب تستاهل 
تقتل بيننا حب زمان 

#بنت_الشمس

الثلاثاء، 27 نوفمبر 2018

احاول التوقف عنك






  

انا احاول التوقف عنك
احاول لملمة مشاعري عنوة 
اسجنها بداخلي حد الصراخ

الغيرة تلتهمني
تمزقني
تمزق قلبي 
تحرقني
تشعل الجحيم حولي 
غيرتي بركان أخشاه 
اقوى من كل البراكين 
قد يمحي مدنا 
ويقتل شعوبا

انا اهواك 
أعشقك
و
أعشقك
و
أعشقك
عشقا ملئ جسدي سقما 
وملئ روحي ببعدك وجعا


كيف انت بدوني ؟!
سؤال لا يفارقني


أتذكرني ؟
أنا لا اتوقف عن التفكير فيك 
للحظة 

كيف أنت وحال قلبك 

اراقبك من بعيد لئلا تضجر


فصرت كقطة تبكي قسوة 
هجر صاحبها


تريده وتخشاه

تخاف ان تقترب فيطردها

وتخاف ان ترحل 
فتموت 
شوقاً اليه 
وبردا خارج احضانه
ووجعا على فراقه


أنا أحبك 
وأحبك
وأحبك
واحبك


وأحاول التوقف عنك 
رغم معرفتي بأنه لا جدوى 
فكل محاولاتي تبوء بالفشل 

فكلما اثور غضباً تجدني

افرغ فيك كامل ثورتي 
وغضبي وألعن قسوتك
وهجرك وظلمك لي


وكلما أهدأ
أعتذر وأخبرك كم اهواك 
وكم انتظر


وكلما أشتاق 
وددت لو انك الوطن 
لو انك السكن 
وددت لو يأتيني 
منك خبر


أنا أحاول التوقف عنك 
أحاول ان اكون 
كتلة من الثلج 
او قطعة من الحجارة
على شكل 
بشر


أحاول التوقف عنك 

وانا اتنفسك

وانا وانت نعي جيدا 
انني قد اموت 
ولكني أحاول 




الخميس، 15 نوفمبر 2018

قهوتي انت






قهوتي أنت

سعادتي ،، بل منتهاها 

لم أكن أدري أني سأحبك كل هذا الحب 

 وأتمنى لو كنت ظلاً لك ، لا مجرد حبيبة تلتقيها  حين 
تشتاق
أو زوجة تغيب عنها وتعود 

لم أكن أتخيل أني سأتمنى يوماً أن انعجن بتفاصيلك 
أعشقك كلك بلا استثناء 

صوتك 

ملامحك

تقاسيم وجهك 

تفاصيل التفاصيل 

قلبي يتأوه اشتياقاً ، وعقلي لا يكف عن الدوران في
 فلكك  

أنت ، وأنت فقط 

حالة مختلفة تفككني ، تبعثرني ، تضيعني 
ثم تجمع كل أجزائي بضمة 

فأذوب فيك 



عودة


ها قد عدت 
اختلف اليوم عن سابقي 
أنا اليوم تجاوزت الثامنة والعشرين 
يعني أنه ربما تغير في الكثير 
الأحلام ، الآمال ، الأسلوب 
نظرتي للحياة 

مدة الغياب كانت طويلة هذه المرة 
كنت فاقدة لشغف الكتابة ناقمة على الحروف 
محاطة بكثير من الخيبات .. والسقطات
لن أعدد خيباتي .. ولن أبرر غيابي بأكثر من ذلك 

المهم أنني عدت 
حقيقة لم أعود رغبة مني فحسب
بل لأن أحدهم طلب مني ذلك
فأهلاً وسهلاً بي :D 

الثلاثاء، 28 أكتوبر 2014

حب نفسك

فات وقت كبير مكتبتش هنا حاجه ..
يمكن شغلتنى الحياه .. والظروف اللى بتمر بيها البلد 
وسدة النفس - وحزن الحزن اللى احنا فيه 
بس يمكن اللى جابنى هنا بصيص الأمل اللى بشوفه فى عيون بودى ابنى 
ان بكره هيبقى أحلى لو اتمسكنا بكل حاجه بنحبها ومفرطناش فيها 
كل يوم بتعلم حاجه جديده وبشوف اللى فات بشكل تانى 
المواقف بشكل تانى - الأشخاص بشكل تانى 
مش هقول اكتمل النضج العقلى لى لدرجة انى اقدر احكم على الأشياء بالحكمة الانسانيه المطلقه 
بس فعلاً حاسه انى مريت بمرحلة من النضج خلتنى اشوف ان كل شيئ وحش عدى فى حياتى كان حاجه جميله اتعلمت منها ووصلت بيها للأجمل والأحسن واتلاشى بيها الوحش ، شفت ان تفكيرى كان قاصر فى وقت ما لما وقفته على بشر بكل سذاجه ، وعرفت ان الاعتماد على النفس هو مفتاح النجاح واستحقاق الحياة ، 
حب النفس مهوش خطيئة ، حب النفس فى حدود المعقول قمة المثالية ،
لما تحب نفسك هتحافظ عليها ، هتسعدها 
فى حدود دينك وعقيدتك .. حتى لا يتحول حب النفس لأنانية وانحلال 
حبك لنفسك هيعرفك مين بيحبك ومين لا ، هيخليك متستناش من غيرها انه يعطيك 
فى كلام كتير عايزه اكتبه  بس جايز وقتى مبقاش يسمح .. 
اكيد لسه عندى  اللى يستاهل انى اكتبه 
دمتم بود 

السبت، 15 مارس 2014

مر عام


عام غير فيَّ الكثير 
بالحب جمعنا 
عرفت معنى المودة والرحمة والعطاء 
عرفت كيف يكون الحب 
الحب  بكل ما يحمل من معانى 
15 مارس 2013 تاريخ يحمل لى السعاده 
التى تمنيتها يوماً ودعوت ربى كثيراً كى يهديها لى 

زوجى الحبيب أكن لك من الحب والإحترام ما لم ولن أكنه لسواك 
أدام الله علينا نعمة الحب .. ورزقنا السعادة 
وأعاننا على ذكره وشكره وحسن عبادته 

الخميس، 7 مارس 2013

قلبى لو حجر .. كان زمانه متكسر

ولما احب وادوب فى الحب والغيره تحرقنى
يكونلى حبيب ولا يهمه الأحزان تغرقنى
يدوس قلبى .. ويتعبنى ويسيب الهم يخنقنى
ولما ابعد واتغرب عنه ..  يلحقنى
يعاقبنى بانى بعدت ..
يعاتبنى لأنى تعبت من هجره
ومن بعده وقسوة قلبه وتجاهله
وينسى وقفتى جنبه
وينسى ان ده ذنبه
مش ذنبى ...!!!

لما حبيبى يجرحنى فى اللحظه 200 مره
بالكلمه  و بالقسوة ..
ويسيبنى لغيرتى المُره ..
ولا يقدر .. ولا يفكر .. بإن لى قلب
بيحس ويتحسر ...
لما  ملامحه فى عينيا ...  بتكشر
انا اتكسر ..
أنا قلبى الرقيق حقيقى  بيتأثر
ولو قلبى مكانه حجر
كان من زمان اتكسر .. !!





الخميس، 14 فبراير 2013

بحن للغربه

وأحياناً بحن للغربه
أو التربه
مهيش فارقه ويايا
لو الحلم الى جوايا
متكسر
200 حته
وهو فى حته
وانا فى حته
وقلبى خاصمنى
100 مره فى الثانيه
واعدى مرحله تانيه
والبرد يحتل كيانى
وبتعذب وأقول تانى
وبتغرب فى احزانى
جايز هرحل ومرجعشى
وخوفى يصحى مينامشى
وقلبى يموت من الضلمه
لما شمسه متطلعشى

وانا شايفه ومش شايفه
هترضى الارض تحضنى
وانا خايفه ؟

الاثنين، 14 يناير 2013

تمنيات

اضطراب مشاعرى .. 
خوفى وتراجعى ...
قلقى الدائم ...


وحبى ...

جرأتى تتلاشى معك
حبى لك يزيدنى جمالاً 
وحياءاً ...


وتمنيات بعودة الزمن 
حيث طفولتى البريئة 
لأسلم قلبى لك ...
فى غلاف برائته 


يكتب الله أقدارنا 
وبكل حال سنرضى
 ويعرف دواخلنا 
وما تحمله قلوبنا 
وبرحمته سيعطينا

ليرضينا ...

سيضمنى القبر يوماً 
ويبدل أضلعى 
وستعرض 
كل نواياى البريئة 
ومن بينها 
( نيتى فى حبى لك )
فلربما ترفع عنى عسر يوم
فأعمالنا نيات .. 


أحببتك لأنك الأقرب 
لعقيدتى ودينى 
 والأرجى حفاظاً عليه ..

سأحبك بلا توقف 

الخميس، 18 أكتوبر 2012

مش عارفه منين احكى

ومش عارفه منين احكى
قصة بدأتها بنفسي
ومش قادره أكملها 
ايديا مش مطاوعانى 
ودايماً عينى سابقانى 
بدمعة تسيل على خدى 
كتير بلوم انا نفسي 
أكيد احساسى بيك خاننى 
وانت كدبتى الأولى 
كدبتها وبصدقنى 
وياما عقلى حذرنى 
بس شيطانى دمرنى 
وخلانى اشوف صورتك 
ملاك حبه بيأسرنى 
ولما فقت من وهمى 
لقيتنى كنت بكسرنى 
ومش عارفه منين انهى 
قصة حب غيرنى 
وهز كيانى وكسرنى 
وسبت فى ايده انا عمرى
انا بس اللى حيرنى 
ازااااى صدقت انا كدبه 
والله كدبتها بنفسي 

الجمعة، 25 نوفمبر 2011

صمت الناااار

صمت اجبرتنى عليه المشاهد  ..
 أرى ولا أستطيع التعبير
أسمع ولا استطيع النطق ..
دهراً .. مكبل بقيود من الجحيم
أكلى .. فقر ..
علمى .. دجلٌ
وجعى .. مر
موتى .. ذل
بل وأباع ليحيا الكل
وحينمااااااااااااا صرخت
لم أجد من يسمعنى ..
أغلقت كل الآذان ..
عميت كل العيوووون ..
تجاهلونى ...
لأن ثمنى أرخص
- فى اعينهم -
من زوج حذاء ملقى
تباً .. وتباً وتباً
لهؤلاء القوم
قررت الآن 
أن أسطر وجعى
برحيلهم
أن يعلو صوتى لخلعهم
قررت الآن أن أحيا أنا ..
والموت لهم
يا أهل الحى  .. انظروا
كم قتلواا منا أحباباً
ليعيشوا هم ..
كم سكن المعتقل شباباً 
كم شلنا الهم ..
سرقوا منى زهرة عمرى
سرقوا الفرحة من تلك الأم ..
حان الوقت فالثورة حق مشروع
لكل الشعب ..
ونحن الشعب ..
بكل ميدان نحصرهم بصراخ يدووووى
سلميه .. سلميه ..
تلك الثورة الشعبيه ..
سنخرج من ثوب الصمت
الذى أجبرتنا عليه المشاااااهد
..............................
مشهدنا الأول بعد الصمت
نطق
ن : نظام يسقط معه ذله واستعباده
ط : طفل يولد عهد حر يثبت بشهادة ميلاده
ق : قطرة دم تروى وطن تزرع شجرة اعياده

وشهيد بات بميدان
أصبح فى جنة رحمان
برصاص الضابط .. علان
نبكيه بيناير أمس
ويعاد المشهد ذاته ... الآن

مشهد آخر
.......................
تسرق ثورتنا ..
نجرى .. نحاصرهم فى الميدان
نصرخ سلمية سلمية
لكن من يسمعنا الآن ..؟؟؟
سوى .. لصوص السلطان
نعم سلطان وما زال السلطان

نصرخ هيا يا اخوان
من يحكمنا اليوم جبان ..
وسيلحق بالركب البائد ..
نركض نركض بالميدان
ويسقط منا الشبان ..
برصاص كلاب السلطان
مشهد يأتى بالأحزان 
.......................................
شهداء الثورة يا احرار
لو أشعلوا بجسدى النار
لن أصمت ثانية أبداً
حتى ترجع بلدى حرة
ويعترفون بالعدوان
وسيقتل هذا السلطان
ويحاكم سبب الطغيان
وسنزرع كل خناجرنا
بعيون كلاب السلطان
تلك حقوق شباب الثورة
ولنختار لنا قبطان
يبحر بسفينتنا العظمى
لينقذ فينا الانسان 
كى تهدئ كل عواصفنا
ولنلحق ركب العمران

الثلاثاء، 2 أغسطس 2011

فارس أحلامى - اخوانجى متحرر -

مش عارفه ليه فى الوقت ده بالذات قررت اكتب كل اللى عايزه أقوله
ومش عارفه رد الفعل اللى ممكن يحصل من اللى هيقرأ البوست ده
وبرضه مش عارفه أبدأ ازاى ، بس بما انى قررت اتكلم يبقى هقول كل اللى بيدور فى عقلى وتفكيرى

فارس أحلامى :
كلمه بنقولها بتعبر عن الشاب الوسيم أبو حصان أبيض اللى بييجى فى الأفلام فى الحلم بتاع البطله
يخطفها على حصانه ويجرى بيها بعيد عن كل مخاوفها وهمومها وأحزانها
وغالباً ما بيكون الامل اللى عايشه عليه البنوته اللى لسه ملقتش فارس احلامها
ان فى فارس أحلام هييجى يخطفها ،
ومواصفات الفارس ده بتختلف من بطله لبطله  قصدى من - بنت لبنت -
يعنى عند بنت تلاقيها ممكن متكونش عايزاه بحصان ابيض وتكون عايزاه بعربية جيب حمرا موديل 2011
وبنت تانية تكون عايزاه بعيون خضر وشعر اصفر والحاجات دى انتوا عارفين البنات بقى - مش محتاجين انى لسه احكيلكوا -

نيجى للمهم :
فارس أحلامى انا ممكن يكون مواصفاته مختلفة شويه - ممكن تكون مألوفه لبعض الناس - وممكن تكون غريبه
خاصة لما يعرفوا وجهة نظرى فى الجواز أصلاً
يعنى أنا مثلاً شايفه ان لو المجتمع ميبقاش نظرته قاسية للبنت اللى ممكن تقعد من غير جواز ويجرحوها بنظراتهم وألسنتهم وتصرفاتهم ويطلق عليها لفظ (عانسكنت هقول انا مش عايزه اتجوز ومش مهم عندى وده طبعاً لأسباب

ان مواصفات فارس أحلامى بالنسبالى مش لقيتها وحاسه انى مش هلاقيها يبقى هتجوز كده وخلاص (~_~) بذمتكوا مش يبقى افترى
اه انا هبقى جريئة واقول ان الجيل الموجود دلوقت من الشباب معظمه غير قادر على تحمل مسئولية بيت وأسرة
وعلى تفهم متطلبات الحياة .. وعلى احتواء زوجته واهل بيته - عشان كده حالات الطلاق زيادة اليومين دول -

والآخر يقولوا الستات زادوا فى- كفران العشير -
مهو مش كل رفض لحاجه بالنسبة للست تبقى كفران عشير ونكران مش عارف ايه

مهو انا بقى عندى مخاوف اعيش حياة الستات المقهورات فى الأرض  :D  ( حلو تعبير مقهورات ده )

عايزه زوج ناضج عقلياً : ( مش معنى كده لا سمح الله ان الرجاله مش ناضجين عقليا ً يعنى بس عالأقل يبقى اكبر منى ب 7 سنين
- وده هتجيبيه منين بقا ان شاء الله - مش عارفه اكيد هجيبه منين ..
بس انا متخيله ان الشخص الى فى نفس سنى او اكبر منى بسنه اواتنين او تلاته هيعيش مستوى سنى ومستوى تفكيرى وانا مش عايزه واحد يقفلى عالواحده ونلعب مع بعض قط وفار وله صحبات مش عارف ايه وعايش معايا ند بند
انا محتاجه زوجى يكون أب ليا قبل ما يكون زوج .. يحتوينى يفهمنى .. لو عندى نقص فى شئ ما يجبره
لو فى حاجه مش عارفاها يعرفهالى يعلمنى .. لو غلطت يكون رحيم بيا ويعرفنى الصح والغلط

عايزه زوج يحبنى : ( الموضوع ده مش مشكله .. فعلاً الحب بييجى بعد الجواز .. واكيد يعنى مش هيتجوزنى عياقه اكيد هيكون بيحبنى وعندنا قبول  لبعض )

عايزاه زوج متدين ( متفتح ) : محدش يقولى ايه ( متدين متفتح دى )
انا فى مره احد الصديقات سألتنى عن مواصفات فارس احلامى اختصرتلها كل اللى بقوله فى كلمتين
 عايزه اتجوز اخوانجى متحرر وكذا حد سألنى وكانت نفس الاجابة هى ردى
مع انى مش اخوانجية - بس انا مقصدتش اللفظ حقيقة - انا قصدت ما يحويه من صفات
يعنى زوج تقى ، متربى تربية فاضله ، من بيت طيب متدين .. متربى عالصلاة والصيام والقيام والجهاد فى سبيل الله
ورعاية الأسرة وقدسية الحياة الزوجية ،  عنده كل ما فى الاخوان  ( من تربية وخلق ودين
اما عن كلمة - متحرر - فأقصد فى الفكر السياسى : متقبل للرأى الاخر ، معاملته لينه ، سهل وبسيط مش متزمت زى بعض الاخوان
ومش معنى كده ان الاخوان بس اللى فيهم الصفات دى .. بس ده من باب شهرتهم الواسعه بهذه الصفات الطيبة .

وده كمان لأنى ( مش اخوانجية ) فصعب اتجوز اخوانجى  بما انهم مبياخدوش الا اخوات  على رأى ( صبحى صالح )

والمشكله ان بعض الناس اللى ممكن يطلبوا االزواج منى يفتقدوا بعض الصفات اللى انا محتاجاها فى زوج المستقبل
اما السن مقارب او فى نفس السن وبالتالى فى أول دعديره بيقعوا
أو - طفوليون - زياده عن اللزوم  ، وانا مش فيا دماغ أدادى
وعلى رأى الأستاذ ( كاظم الساهر ) ان الرجال جميعهم أطفال  فده مش معناه ان الأكبر منى ب7 سنين مش هيبقى طفل أكيد هتعامل معاه بما يرضى الله وهكون برضه حنينة عليه وكويسه معاه .. لأن بمعنى أصح المعاملة من ناحية ( المرأة ) مع زوجها أياً كان مواصفاته -ثابته- لأن من اهم صفات المرأة حنانها .

او مش متدين - من وجهة نظرىمهو التدين مش صوم وصلاة وزكاة وبس
لا التدين حاجات تانية كتير اوسع فى مفهومى عن التدين من حصرها فى الفروض والعبادات البدنيه
انما التدين عندى بجانب العبادات البدنية لازم يكون تدين فى -الفكر المجتمعى
والفكر السياسى  وخاصة الفكر السياسى ده 
آه مهو ممكن يكون واحد بيصلى ويصوم ويزكى وييجى يقولك انا فكرى السياسى ليبرالى .. ده ممكن اخبطه فى دماغه بأى حاجه تيجى فى ايدى .. سامحونى بقا أصل الحوار ده بيعصبنى . 

ممكن أقول يكون ( أزهرى ) تصدقوا والله ممكن  ،حتى هيوافقنى فى كل افكارى ومعتقداتى ونظرياتى دارس نفس دراستى وفاهم الدين كويس .. وفكره السياسى هيكون اسلامى معتدل ، مهو مش معقول اللى ههرب منه هلاقيه فى وشى - مش معقول فى أزهرى ليبرالى او علمانى او مش عارف ايه - وإلا لو فى يعنى يبقى مش دارس فى الأزهر  ده يبقى دارس تحت بير السلم .

انا مش خايفه لحد دلوقت عالأقل ( لأنى لما برفض حد ) او ميكونش فى نصيب بينى وبين حد  - ببرر لنفسى بإنى لسه صغيره -
ومواصفات فارس احلامى مش كبيره للدرجه انى ملاقيهاش فى بشر يعنى .

لأنى اللى شجعنى انى أفصح عن المواصفات دى انى فعلاً لاقيتها فى ناس  - يعنى موجوده - مش مستحيله بس الناس دول معظمهم عشان كبار بيبقوا متزوجين وعندهم عيال كمان .

والله انا لو لاقيت المواصفات اللى انا قلت عليها فى رجل متزوج وعنده استعداد يتجوز مره تانيه ( صدقاً مش هرفض ) بشرط يكون مقبول شكلاً وموضوعاً .
وبشرط ان ملاقيش المواصفات دى فى حد لسه متجوزش .

ناس كتير هتقول الكلام ده ينزل فى اعلان طلب للزواج  فى جرنال او مجله - بس أنا قصدى تانى خالص من البوست ده -
قصدت أقول للشباب اللى مقبلين على الزواج ان فى بنات كتير زيى .. مش كل  أملهم فى العربيه اللى انت راكبها ولا لون عينيك
أهم حاجه نضجك العقلى وثقافتك وتدينك ..
مش منظر لبسك اللى هيفرق معاهم مش مهم بدلتك سعرها كام ، او موبايلك نوعه ايه .
ان فى بنات بتحط مقياس حفاظك عليها بمقياس حبك لدينك .
ان فى بنات مش محتاجه من أكتر من ان انت تكون لها أب حنون وزوج محب ، وأخ شجاع ، وصديق وفى . ومعلم أمين ورب أسرة ناجح .
ممكن واحد بعد ما يقرأ يقول هما البنات هيتشرطوا ويقولوا عايزين مش عارف ايه وعايزين ايه اومال هما هيعملوا ايه .
مش هقول أكتر من ان البنت اللى هتطلب يكون رفيق حياتها زوج تقى انها هتنفذ الوصايا العشره اللى وصت بهم الاعرابية بنتها .

اللهم اجعلنا مؤمنين حق الايمان .. وزد ايماننا .. واجعلنا للمتقين امام
اللهم ارزقنا طهر مريم .. وتقى يوسف .. ورقة قلب محمد عليه أفضل الصلاة والسلام .


الخميس، 21 يوليو 2011

يسقط الشغل .. يحيا الفشل

   ياااااااااااااااااااااه أخيرا ًلقيت وقت اقدر فيه اكتب من جديد
بس للأسف مش لاقيه كلام اقوله .. رغم انى تقريباً دماغى لا تتوقف عن التفكير فى اشياء كتير نفسى اتكلم عنها ..
واخرج بره نفسى زى زمان .. واملى الدنيا مرح .. ومرح .. ومرح
محتاجه احس .. بجو جديد .,. عايزه اخرج واتفسح .. واشوف اصحابى وزمايلى ...
محتاجه حاجات كتير انساها مش عارفه انساها ... بالرغم من انى بعمل المستحيل عشان انسى
اوجاع الدنيا صعبه ... والاحساس بالظلم احساس وحششششششش جداً ..
والاحساس بعدم الاستقرار .. وعدم الامان احساس بشع مستفز ..
شغلى الجديد خلق بينى وبين الناس حلقة وصل بدايره اوسع من الجامعه .. والبيت والشارع
اتعلمت حاجات كتير .. واتعلمت اكون متواضعه اكتر .. وجريئة اكتر .. واحيانا شرسة اكتر
زحمة الشغل حبستنى .. ممكن اكون مش قد تحمل المسئوليه .. عشان كده مليت وزهقت بسرعه
مهو اكيد مش علشان انا فافى يعنى :)) ( مش باين عليا ولا اييييييييه )  اكيد فافى يعنى ومش حمل انى اصحى 7 الصبح
وارجع 5 بعد الظهر .
ومش حمل التكييف اللى من اول اسبوع نمت بسببه 4 ايام فى السرير مبتحركش والسخونيه متفارقنيش
فقررت انى افضى بقا لنفسى واسيب الشغل .. ( وهتحمل التريقه اللى هاخدها من بابا وماما واونكل وطنط والجيران كمان .. من اللى قالولى شغل اييييييييييه البيت احسسسسسن وانا اقولهم : أبـــــــــــــــــــــداً لازم اشتغل وعملتلهم فيها سبع اسود فى بعض )
هعمل ايه لازم اتحمل نتيجه قراراتى ..
..
وهبلغهم بقرارى الجديد .. بما انى اشتغلت اسبوعين ... لازم اتفسسسسسسسسسسسسسح واخرج مع اصحاااااااااااااااااااابى اسبوعين .. انا عارفه الاعتراض هيبقى بكل حاجه ممكن يطولوها فى ايديهم .. من جزم ومقشات ومش بعيد الكنب يخلعوه ويزقلونى بيه ...
بس كله يهون فى سبيل ... انى اخرج بقااااااااااااااااااا واشم هواااا تانى ...
نفسى اروح اماكن كتييييييييير جداً
نفسى اروووووووح المنصوووووووووووووووووووووووووووووووووووره
بس اتفسح فيها بعد المغرب لأن الجو هناااااااااااااك بيبقى جاااااااااامد ..

ونفسى ارووووووح دميــــــــــاط .. واقعد مع دوجى حبيبتى وروح قلبى وصديقة الكفاح ..
واشترى من هناك مشبك واروح راس البر ... واركب مركب فى النيل بالليل


ونفسى اروووووح العريش .. واتمشى هناك عالشط فى المساعيد
وانزل وسط البلد هناك .. واشترى شااااااااااااورمة من اكبر محل شاورمة هناك

ونفسى اروح اسكندريه واتمشى على كوبرى ستانلى واقعد هناك شويه واعدى بين العربيات
.. اللى بتجرى بسرعه هايله
بس يا رب ما اموتش ..  عشان اروح باقى الاماكن اللى نفسى فيها ..
واروح اضربلى سندوتش شاورمة من عند مؤمن :))

واتمشى بطول الكورنيش بالليل برضه  عشان الشمس بتبوظ لون البشره :))))

ونفسى اروح مرسى مطروووووح سمعت عن سحرها ونفسى ازووووووووورها بجد

ونفسى ارووووح الأقصر واسواااان ^_^    


ونفسى بقا اقضى كام يوم كده فسح فى القاااااااااااااااهره .. (الحسين . وحديقة الازهر . والقلعه ....... الخ الخ الخ )

وبجد نفسى ربنا يكرمنى كده واسافر السعوووووووووديه لأنى بعشق البلد دى من صغرى .. حتى بحبها عالخريطه
ونفسى ازور جده .. والطائف .. والمدينه ... ومكه
نفسى احج قبل ما امووووووووووووووووووووت  .... والله أمنيه كل ما افكر فيها بحس ان روحى هناك مش هنا


كفايه كده دى الاماكن اللى كان نفسى ازورها الأجازه دى ( عدا موضوع السعوديه ده )
ده كان بوست افتتاح اجازتى الرسميه ... وربنا يسهل لسه فى كتييييييييييير

وان شاء الله استنونى
.. وزورونا تجدوا ما يسركم

السبت، 18 يونيو 2011

عندما يستفزك احدهم


حين يستفزك احدهم .. 
من الطبيعى يكون لك رد فعل من الاتنين 
يا إما تقووووووووله يا (.........)  يحموك فى كنكه 
يا إما الحل التانى انك تكتم غيظظظظظظظظظظظظظظظك جواك 
مش من مبدأ ( والكاظمين الغيظ ) لاااااااا  
وطبعاً الحل التانى ده بيبقى نتيجة حاجه من الاتنين 
الأول : ان اللى استفزك يكووووون واخد بشله فى وشه وتعرف انك من الاخر 
(هتقطع انهارده
والتانى : انه يكوووون مش فاهم انه بيستفزك فساعتها لو انت كان لك اى رد فعل تانى 
مش هيأثر فيه وبالتالى ممكن يجيلك انت جلطه ....
زى النهارده مثلاً رجعت من الامتحاااااااان ركبت الميكروباص اللى بيروح عالعاشر 
ونمت طول الطريق من التعب والله ... 
وقلت اخلى الراجل ينزلنى قريب اخد تاكسى يوصلنى بسرعه لاحسن هموووووت
نزلت ووقف تاكسى .. وقلتله ( ممكن توصلنى ......) قاللى ماشى 
بقوله الملف الجاى .... قاللى انتى مقلتيش انك عايزه المجاورة من الناحيه التانيه وانا لازم اوصل الزبون 
احمر وشى نرفزةً .. وانا شبه نايمة على نفسى ...
وتقريباً السواق قرر يحمصنى فى الشمس .. ادتله 5 جنيه ادانى منها 2 جنيه بقوله ايه انت موصلتنيش 
لسه ليا جنيه ... قاللى ليه يا ابله .. قلتله دنا جايباك من اول الشارع انت لسه محودتش 
قالى وانا مالى ... نزلت وانا بخانق فى نفسى بس طبعاً رد فعلى الغلباااان كان انى اكتم غيظى وانززززززل 
فى الصحرااااااااااااااااااااااااااا   ... واخدها مشى ربع ساااااااااااعه فى عز الحر الساعه 2 الظهر 
لحد ما وصلت البيت ... 
وانا ماشية عماله اقوووووووووووول ... والله لو شفته تانى لاوقفه (ولما يقف
هقوله خلااااااااااص مش راكبه .
لأن ده طبعاً من النوووووع
الأول : ان اللى استفزك يكووووون واخد بشله فى وشه وتعرف انك من الاخر 
(هتقطع انهارده )
روحت البيت من تعب الحر الى مشيت فيه مقدرتش حتى اناااااااااااااااام 
انا مقدرتش اقوووووول غير ان الراجل ده تالت واحد يستفزنى قوووووووووووى كده بعد (الاخوان) فى تصرفاتهم بعد الثورة بس مش معنى كده انى بكره الاخواااان
اما النوع التانى : انه يكوووون مش فاهم انه بيستفزك فساعتها لو انت كان لك اى رد فعل تانى 
مش هيأثر فيه وبالتالى ممكن يجيلك انت جلطه ....
وده تانى واحد يستفزنى ...
وده شخص تلاقيه دايماً متردد .. ومبيتحكمش فى انفعالاته ولا بيقدر تصرفاته ممكن يترتب عليها ايه 
هواااااااااااااااااااائى .. تلاقيه اوقااااااااااااااااات تصرفاته تستحق الثناء .. واوقاااااات يستفزك لدرجة انك تكتم فى نفسك لأن مينفعش تقوله ياااااااااااااااتافه .. 
انهارده يقولك مع البرادعى .. وبعد نص ساعه لالالا البرادعى وحش 
انهارده يشوووف ايمى ... يرجع لاصحاااابه انا بحبهااااااااااااااا
تانى يوم يشوف سوزى .. يرجع برضه لنفس اصحابه انا بحبهاااااااا 
ولا يكون عااااااااايز ينجح .. وهو مفتحش الكتااااااااب 
ولا يكون قبل الثورة بيحب حسحس .. وبعد الثورة (ابو حسحس واللى جابوه)
او يقول حاجه ويرجع فى كلااااااامه ... ساعتها الواحد بيكتم غيظه عشان لو مسك الجزمه نتفها على دماغه .. مات 
خسارة الواحد ياخد فيه ساعه ...
والنوع ده يا جماعه .. مهما كان له تقدم فى حياته ..
الا انه عمره ما هيستقل برأى ويثبت عليه .. او فكره ويدافع عنها .. 
ويا مكتر النوع ده من الشباب والبناااااااات (حاجه تفرح)
كل ما عليك انك تهدى اعصااااااااااابك .. وتاخد مج هوت تشيكوليت 
بعد كل موقف مستفز .. 
وتحاول تعيش حياتك بشكل تلقائى مهو مش كل من هب ودب يعصبك 
لازم ندى كل واحد حجمه فى حياتنا 
وانا قررت أنزل كل الناس منازلها فى حياتى 
اللى مبيستفزووووش على جنب ... واللى بيستفزوا عالجنب التانى 
وقررت ارتبهم حسب الموضوع ده ترتيباً تنازلياً 
وقال على رأى المثل ( بكره تشوف اللى عمرك ما شفته
ولسه ياما هنشوووووووف وربنا يستر عليا دنا لسه صغييييييييره

الجمعة، 13 مايو 2011

أقاوم النسيان

على شفا حفرة من النسيان
ارتعد خوفاً ..
أقاوم نسيانك ... اقاوم كل مشاغل الدنيا
حتى لا تأخذنى منك
أراك فى قسوة قلوب البشر
وأراك فى حنان عيون طفل بريئ
كم احبك ..
كم ارانى خائنة ....
عندمت يأخذنى الوقت وتذهب ملامحك عنى
على الرغم من انك من خنت أمالى ..
لا عليك دعنا من كل هذا الكلام
ما عاد يفيد .. لا العتاب يجدى
ولا البكاء يرجع بالحبيب
.. سأحكى لك عن اخر حكاياتى
فرد عليّ كما عهدت ولا تخذلنى ..
فأنا ما زلت انا .. لم اتغير بعد .. لم اتكبر بعد
مازلت انتظر نصيحتك .. حنان كلماتك
رفقك بى
سأحكى لك فهل تسمع :.
عام من الألم له أخضع ..
احاول الصبر ..
احاول لملمة مشاعرى المبعثرة
أتوه بكلمه .. واتعقل بكلمات
حالة من الهذيان ..
فقدت صداقاتى كلها....
كأننى بكابوس مخيف ..
لم أعد اعرف الخوف من بشر
لم اعد اعرف الخجل أو اشعر بالأمان
الرجال كلهم سواسيه
النساء كلهن هى ...؟؟
اتعرف كم أحبها ..
فصديقتى الوحيدة تشبهها
عيناها شفتاها ... حتى قسوتها
اعطيها حبى كله برضاى .. أشعر بالسعاده
فى رؤية ابتسامتها .. اشعر انى ارضيك فيها
أحبها .. بل اعشقها
حكايتى تتلخص فى غضبها منك ..
لا اعلم لمَ تتهمنى بالجنون
عندما احكى لها عن حنانك لم تكن تصدقنى
ولكن عندما تسقط دموعى حنيناً لك تمسح
بيديها دموعى ....
وتثور غضباً ان قلت لها .. انها تشبهها
فقدت غيرة النساء مللاً ..
لم أعد اعرف الرحمة مع من أغضبونى يوماً ما
سرعان ما أثور .. وملت منى عصبيتى
فقدت مظهرى .. وقوامى .. وملامحى
وعلى وشك توديع ابتسامتى
عند ذكر اسمك .. اتلعثم .. تتبدل ملامحى
او اهيم فى ذكريات .. كلماتنا .. حكاياتنا
مللت الحياة واظنها .. ملت منى
كل ما اخشاه بعد الموت ألّا ألقاك
قأنا فى الصحو أتمناك .. وفى الحلم أعيش معك
وبعد الموت اتمنى حياة سرمدية فى هواك
كما تعاهدنا ..
فأنا يا حب العمر .. لم أنساك
سأقاوم نسيانك .. وادعو الله أن يرعاك
هذه بعض حكايتى ..
ولم تنتهى بعد الحكايات .. فأرجوك لا تمل منى
فربما اعيش لسنوات ...
فإن مللت منى الان .. لمن احكى
لمن اهدى هذه الكلمات ؟؟؟؟؟